Par el prof. Flaminio De Poli

A go conosù Flaminio De Poli, ansi, el profesor Flaminio De Poli come ke l'è senpre sta par tuti nialtri, na ventina de ani fa; par diversi amizhi de la basa padovana (Angelo Gusela da Castelbaldo, Claudio Negrisolo e Luigi Faccia da Conselve, Flavio Contin da Casale) el jera zha on mito, e el so "Il Veneto dei veneti" el jera el n...ostro picolo "Vandelo".On omo, mejo, on Omo con la o maiuscola, kon on rigor, na morale, na kultura straordinarie, ke te colpiva al primo incontro e ke le volte dopo te lasava drento senpre kalcosa; e proprio par el so rigor non el ga vu kuelo ke ghe spetava dal mondo de la kultura e de la scola; el prof. non el jera in vendita e anka ai "potenti" de la so tera el ghe le cantava ciare.On Omo, on studioso ke ga rapresentà e ga portà senpre vanti la dignità e l'onor de esar veneti in tuta la so vita, stanpando, a so spese e senza spetarse gniente, diversi libri in lengua veneta quando scrivar in veneto jera da sotosvilupai o e da jente senza cultura.Da "La Degora" del 1970 a "Paolino de la Gjrometa", da le "Prediche de Santo e altra jente" a "Sapienza senza pagella" a tanti altri libri fin a "Via da Roma!": scomodo a la cultura ofizhial, scomodo anka a la pulitica, anka a kuela venetista, visto ke kualkedun jera "geloso" de la so "sapienzha" e de la so dimension.E "Via da Roma!" l'è servio par svejar tanta zhente, par farghe capir kosa ke xe el Veneto e kosa ke xe l'Italia.Sentì kosa k'el scrive a proposito de la "Veneticità":"Esiste una veneticità remota e attuale: occorre ricordarcene, bisogna sentirla, volerla, realizzarla, ponendo così fine alla alienazione italica".Ah, se el nostro popolo el se rendese conto de kosa ke vol dir "alienazione italica"!!!Ma a vui anka ricordar kuanto ke ghe xe capità dopo el 9 de majo del 1997, kuando ke l'è sta incolpà de ver fato parte del Veneto Serenissimo Governo e k'el se ga trovà dela zhente, ke parlava taljan e ke vegneva kisà da dove, a casa sua a le sie de la matina. "Aprite che altrimenti sfondiamo la porta" i ghe ga dito al profesor e a so mojere sta "brava" zhente ke parlava el taljan: mi a no so kosa ke i 'ndava in zherca a casa De Poli, ma so ke l'unica so "arma" la jera la so testa, el so zhervelo e difati i taljani a no i ga trovà gniente, come ke i no ga trovà gniente a casa de la nostra xente ke la xe ancora soto proceso.E me ricordo come ke el di dopo sui du jornai de Rovigo a ghe fuse on mucio de zhente ke ga scrito par difendar el prof. De Poli, el nostro prof. De Poli, zhente del mondo de la scola, zhente de tuti i partiti.E xe drento de mi anka la so delusion, el so peso par sta storia ke seguramente la xe sta tanto pesante par Lu, par on Omo ke non jera mai 'nda' so na caserma dei carabinieri, vedarse soto proceso, in tribunal, par non ver fato gniente, oltretuto, solo par el so esar veneto, par el so sentirse veneto.....Na storia ke xe sta decisiva par portarnelo via, par portar via la so straordinaria cultura al nostro Veneto e chisà se on jorno kualkedun ke parla taljan no paga anka par kuesto......E vui ricordar anka la so jenerosità, el so esar senpre pronto quando ke ghe jera da scrivar on toko par i nostri jornai (lora, quindaxe ani fa a jerimo pena partii con "Veneto novo") e go ancora dei toki ke, se "Raixe Venete" a me da na man, podemo stanpar.Grazhie prof. De Poli par tuto kuelo k'el ghe ga da al nostro popolo, par tuto kuelo k'el ne ga insegnà, par tuto kuelo k'el ga rapresentà par niantri.Ettore Beggiato (da Raixe Venete n. 10 - 2004) Altro...